Kennt dir nach de Rubik‘s Cube?

Vill vun eis hunn als Teenager (mat méi oder manner Erfolleg) probéiert dësen Zauberwierfel rëm a säin Originalzoustand mat 6 eefaarwege Säiten ze bréngen. Et gëtt mëttlerweil och offiziell Kompetitiounen, déi vun der World Cube Association (WCA) organiséiert ginn. Hei kënne Speedcuber offiziell Zäiten a Rekorder a verschiddenen Disziplinnen opstellen. Am Kader vun den aktuellen Diskussiounen ëm eng „gesond Screen- Life- Balance“ ass de Speedcubing eng flott Pausen- a Surveillance – Aktivitéit, déi vill Jonker uschwätzt. Beim Speedcubing sinn eng gutt Memoire, Gedold, gutt Reflexer, Ausdauer, Koordinatioun a Villes méi gefrot.

Fir eise 4es-Schüler dës Aktivitéit virzestellen, ass den 11. November 2024 eng belsch Delegatioun vu Schüler a Schülerinnen, déi dëst Joer um Rubik’s WCA European Championchip a Spuenien deelgeholl hunn, an den LCE komm. No enger kuerzer theoretescher Presentatioun am Spigelsall sinn eis Schüler vun hiere belsche Kolleegen an de „speedcubing“ agefouert ginn.